Taga Warwick Barracks 3 ra ang miaplay og relocation site

CEBU, Philippines - Bisan og ang dakbayan sa Sugbo mitanyag na og tabang paghatag og kapuy-an sa nasunogan nga pamilya gikan sa Warwick Barracks Market apan hangtod karon tulo pa lang ang miaplay kanila.

Ang dapit nga gipapilian kanila nga papuy-an mao ang relocation sites sa dakbayan didto sa Sitio Laguerta sa Lahug ug didto sa Barangay Budlaan.

Matud ni Collin Rosell, ang hepe sa Division for the Welfare of Urban Poor (DWUP), nga wala siya masayod nganong gamay ra kaayo ang miaplay alang sa pag-angkon og kapuy-an.

Gipasabot ni Rosell nga ang dakbayan sa Sugbo dili gani g’yud obligado nga mohatag og relocation site sa mao nga mga pamilya tungod kay ang ilang gipuy-an alang ra sa merkado apan ilang gitukoran og kabalayan.

Si Mayor Michael Rama dili na mouyon nga papuy-on pagbalik ang mao nga pamilya sa Warwick Barracks market, ang dapit nga nahimutang atbang sa Carbon market Unit 1.

Atul sa pagbisita ni Presidente Aquino dinhi sa Sugbo kagahapon, ang pipila sa mga nasunogan nga pamilya miapil sa nagpahigayon og protesta ug sila miawhag nga tugotan sila nga makabalik sa kanhi nila gipuy-an.  (BANAT NEWS)