CEBU, Philippines - Duha ka tawo ang nadakpan tungod sa pagdala niini og drugas sa managlahing lugar sa dakbayan sa Sugbo ug Mandaue sa miaging adlaw.
Unang nasikop si Salem Abarial, 22, taga sitio Dita sa barangay Talamaban sa dakbayan sa Sugbo.
Si Abarial nakit-an sa kapolisan sa Talamban human makit-i nga duna siya’y gilabay nga putos atol sa pag-agi sa mga nagpatrolyang polis sa maong lugar.
Dihang gipangita sa kapolisan nasuta nga ang gilabay ni Abarial mao ang usa ka pakete nga shabu.
Samtang nasikop sab sa kapolisan si Rian Quimque, 27, molupyo sa sitio Galaxy sa Maguikay, Mandaue.
Gisita sa kapolisan sa checkpoint si Quimque dihang wala kini magsul-ob og helmet ug nagsul-ob lang kini og tsinelas. Dihang girekisa si Quimque nasuta nga nagdala kini og upat ka pakete nga shabu.
Sa laing bahin, gipasakaan og kaso sa kapolisan ang duha ka gikatahapang pusher og shabu nga nadakpan sa buybust operation diha sa sitio Lumbang, barangay Pulpogan, lungsod sa Consolacion niadtong miaging Sabado sa gabii.
Ang gipasakaan nila ni Sr. Insp. Franco Rudolf Oriol sa kapolisan sa maong lungsod mao sila si Melvin Barbadillo, alyas Pungkol, 30 ug Leonesa Duron, 49, pulos nagpuyo sa maong dapit.
Kaso nga kalapasan sa Section 5 sa Republic Act 9165 o Comprehensive Dangerous Drugs Act of 2002 maoy ilang gipasaka batok sa duha. (Bryner Diaz ug Romeo T. Limpangog/EIM)
33 pamilya miboluntaryo’g demolis sa ilang balay
Miboluntaryo sa pag-demolis sa ilang panimalay ang 33 ka pamilya nga nagpuyo sa dalan A.C. Cortes sa Barangay Ibabao sa dakbayan sa Mandaue nga naapektohan sa road concreting ug drainage improvement nga gipatuman sa Department of Public Works and Highways (DPWH) nga gisugdan na kagahapon.
Si Tonypet Juanico nga maoy pangulo sa Urban Housing and Development Office (HUDO) miingon nga 33 ka pamilya ang naapektohan adunay tulo nga nagpabayad ug ang nahibilin maoy mibulontaryo sa pagguba sa ilang mga panimalay.
Ang drainage improvement sa DPWH mao ang pagbutang og dagko nga mga imbornal sa maong lugar tungod kay pirme kining lunopan sa baha.
Dunay siyam ka pamilya nga maapektohan nga nasuta nga nagpuyo sa pribadong luna nga kinahanglan pang bayran sa gobiyerno.
Si Edgar Sanchez sa HUDO miingon nga ang maong pamilya nga naapektohan miboluntaryo pagguba sa ilang mga panimalay tungod kay mi-expire na ang 60 ka adlaw nga gipadalang pahibalo nga pabalhinon sila sa 6.5 ektaryang relocation site sa Paknaan.
Hinuon si Juanico miingon nga ang gihimo karon sa kagamhanan sa dakbayan mao ang pagtabang na lamang sa maong mga pamilya sa ilang pagbalhin pinaagi sa pagtukod og temporaryo nilang balay. (/EIM)(BANAT NEWS)