Pabor-pabor sa LTO

CEBU, Philippines - Trese ka kawani sa Land Transportation Office  mipasaka og reklamo didto sa regional office sa Civil Service Commission batok ni LTO-7 Acting Regional Director Arnel Tancinco.

Gawas ni Tancinco, giapil usab pagpasaka og kaso sila si acting Assistant Regional Director Alita Pulga ug Lovelien Sulib, kinsa na-promote isip Traffic Regulation Officer (TRO) II.

Ang mipasaka og reklamo batok ni Tancinco ug mga kauban mao sila si Melva Vasquez, Bernardo Borromeo, Editha Soco, Josefina Tambolero, Francisco Nailon,  Carmenia Caballes, Betina Mangubat, Eduardo Adalid, Maria Deanna Grace Nosdo, Ida Mangubat, Lydia Lastimoso, Erwin Aquinde ug Jenever Magdadaro.

Pipila sa mga mireklamo mga kanhi hepe sa lainlaing LTO branches sama ni Borromeo nga hepe sa Talisay apan gibalhin ni Tancinco og laing pwesto.

Ang mga mireklamo didto sa Civil Service Commission mipasangil nga gihikawan sila ni Tancinco sa importante nga mga impormasyon bahin sa mga bakante nga posisyon sa rehiyonal nga buhatan sa LTO.

Gipasanginlan usab nila si Tancinco nga mihimo og mga paagi aron nga mabentahaan sila sa uban nila nga mga kauban nga suod sa mao nga opisyal ug sila dili matudlo og mga maayo nga katungdanan.

“They withheld valuable information to the complainants but give advance information to their favorites thereby depriving our rights to be promoted being employees next-in-rank,” matud pa sa reklamo.

Mipasangil ang 13 ka mireklamo nga kawani nga ang gibuhat nila ni Tancinco usa ka kalapasan sa Republic Act 6713, kon Code of Conduct and Ethical Standards for Public Officials and Employees.

Ang mga mireklamo miingon nga kinahanglan unta nga ang Notice of Vacancies gibutang sa lugar sa ilang opisina nga daling makita nilang tanang mga kawani.

Apan matud pa sa mga mireklamo nga gi-post ang maong notisya dihang hapit na ang deadline sa pag-apply.  Mipasangil sila nga kadtong mga suod nga kawani ni Tancinco giingnan nang daan nga andamon ang ilang mga papeles nga mosuporta sa ilang aplikasyon.

Gawas sa RA 6713, ang mga mireklamo miingon nga nakalapas usab sila si Tancinco, Pulga ug Sulib sa Civil Service Law and Rules of Appointments.

Matud nila ang pagka-promote ni Sulib isip TRO II gikan sa Salary Grade 8 ngadto na sa Salary Grade 15 naka- bypass sa ubang empleyado nga mas senior pa ni Sulib sa serbisyo.

Nasayran nga ang sama nga mga mireklamo nga kawani sa LTO mipasaka usab og buwag nga kaso nga naglambigit sa kalapasan sa Anti-Graft and Corrupt Practices Act batok ni Tancinco didto sa Ombudsman-Visayas.

Sa iyang bahin, si Tancinco miingon nga walay basihanan ang reklamo sa iyang mga sakop. Matud ni Tancinco nga dili usab tinuod nga wala niya pahibaw-a ang mga kawani sa LTO nga adunay bakante nga pwesto aron kadtong gusto maka-apply.

Gani matud ni Tancinco nga ang tanang hepe sa mga opisina sa LTO iyang gipadad-an og E-mail kabahin sa gi-open nga pwesto apan dugay sila nga misumiter sa ilang aplikasyon.

Giangkon ni Tancinco nga dunay usa ka kaso nga gisang-at batok kaniya nga tua giduso sa Department of Transportation and Communication (DOTC) ug aduna ‘say kaso nga tua sa Ombudsman. (/EIM)(BANAT NEWS)