‘Most Outstanding Advisers’

CEBU, Philippines - Duha ka magtutudlo sa Sugbo ang gipasidunggan isip 2013 Most Outstanding School Paper Advisers atol sa gihimong Regional Schools Press Conference diha sa Dakbayan sa Naga ning bag-ohay lang.

Si Mrs. Violeta Arnoco-Arsolon sa Marigondon National High School (sakop sa Lapu-Lapu City Division), ug si Mr. John Mich E. Fernandez sa Oprra Elementary School (Cebu City Division) giila isip Most Outstanding School Paper Advisers.

Si Ma’m Arsolon 16 na ka tuig nga magtatambag sa mantalaan sa ilang tulunghaan, samtang si Sir Fernandez unom  na ka tuig niini. Sulod sa maong gitas-on sa iyang pangalagad, si Ma’m Arsolon maisip nga diwanag sa mga nagmadaugon sa Regional Level, labi na sa natad sa Photojournalism.

“Local TV reporter Carmi Cavanlit is a testament to our efforts in the earlier phase of putting up our school publication,” mapasigarbohong pamahayag ni Arsolon.

Samtang si Fernandez, nakatampo na sab og kadaugan alang sa Oprra Elementary School sa National Level diin ilang nasakmit ang Unang Ganti sa Sports Writing category niadtong 2011.

Matud pa ni Arsolon iyang gitahasan ang iyang mga kaubanan aron ma-pokus ang matag kategoriya sa pagpanuwat, broadcasting, cartooning ug  photojournalism.

Hinuon, nagkanayon si Arsolon nga ang halawom nga interes sa journalism maoy nakapaagni kaniya nga dawaton ang gitanyag kanhing pagka-magtatambag.

“Before a mentor can influence a student, dapat duna gyud siya’y passion sa journalism. In my case, I used to dream of becoming a field reporter. Pero sa amoa sa Lanao (del Norte), there wasn’t yet an intensive program for aspiring women-journalists in my time. Tiwasan pa sa akong amahan nga wa gyud mouyon sa akong plano kay lagi delikado man sa amo mag-reporter, so for a while I dropped the idea,” pasabot niya.

Nabalik ang iyang gana sa journalism dihang gikakitaan siya sa iyang mga labaw og potensyal sa pagpanuwat, matud niya, kung dili siya mamahimong field reporter manudlo nalang siya.

Nakatapos siya og Doctorate Degree in Literature and Communication ug Bachelor of Arts in Filipino sa Mindanao State University – Iligan Institute of Technology.

Samtang si Fernandez mapasalamaton sab sa iyang kasinatian isip campus writer kay duna na siya’y giya daan unsay buhaton labi na og mga bata ang magtuon isip magsusuwat, isip broadcaster, isip photojournalist, magtatampo, maglilindog, ingon man dibuhista. “While in college, active na ko sa school paper sa Cebu Normal University,” niya pa.

Iya usab nga gisaysay nga niadtong tinun-an pa siya sa Oprra Night High School, isip batan-ong magsusuwat alang sa ilang pamantalaan, naaghat sab siya sa pag-apil og indigay sa sinuwatay sama na lang sa Editorial Writing.

Nakatabang ni nga masabtan niya unsa pay angayan nga pamaagi aron mapanindot ang pagtudlo ug mamahimong makalingaw ang kalihukan ngadto sa mga tinun-an inay yugo o dungag nga buluhaton isip estudyante.

Sa pagkakaron, si Fernandez lang ang nangunay pagtudlo sa tanang kategorya sa pagsuwat, lakip na ang broadcasting, kay kuwang pa siya sa kaabag gamit ang regular school-based training alang sa mga bata nga dunay hilig sa pagsuwat, mga tinun-an diha sa ikatulo ug ikaupat nga ang-ang.

“By the time they reach Grades 5 and 6 they are already ripe for competitions, and I always push them to aim high. Dapat makadaug gyud sila,” pahimug-at ni Fernandez.

Sa Abril, ubanan ni Fernandez ang duha sa iyang campus journalists ngadto sa Angeles City, Pampanga alang sa National Level – sa News Writing ug Copyreading and Headline Writing categories - kay nakuha man karon sa Oprra Elementary School ang dungog isip First and Second Placers sa maong mga kategorya. (BANAT NEWS)