Pagcor Funds pwede ra gastuhon sa pasyente

CEBU, Philippines - Ang chief accountant sa dakbayan sa Sugbo miingon nga ang Pagcor Funds mahimong gastuhon pagbayad sa mga ospital nga gidad-an sa mga pasyente nga gibalhin gikan sa Cebu City Medical Center (CCMC) pagkahitabo sa linog kaniadtong Oktubre 15.

Mao kini ang tubag ni Mark Rossel Salomon, hepe sa City Accounting Department, dihang ang mga sakop sa Cebu City Council nagpakisayod kun magamit ba ang Pagcor Funds nga ibayad sa mga ospital nga naningil na sa City Hall.

Kapin lang sa 30 ka pasyente ang gibalhin sa lima ka pribadong ospital sa dakbayan sa Sugbo apan ang bayranan miabot og kapin sa duha ka milyon ka pesos tungod kay dunay mga pasyente nga miabot og P200 mil ang obligasyon.

Si Mayor Michael Rama miingon nga kay ang dakbayan sa Sugbo man ang nagpabalhin sa mao nga mga pasyente ngadto sa lima ka pribadong ospital, angayan g’yud nga bayaran sa City Hall ang mao nga kantidad.

Ang dakbayan sa Sugbo makadawat og P3 milyones matag buwan nga donasyon gikan sa Philippine Amusement and Gaming Corporation (Pagcor) tungod sa pagtugot nga maka-operate dinhi sa dakbayan ang gambling Casino.

Ang Pagcor hinoon milatid kun unsa ang mahimong gastohan sa ilang donasyon. Matud ni Accountant Salomon nga ang pagbayad sa hospital bills sa mga kabus apil sa nalatid sa guidelines.(BANAT NEWS)

Show comments