Cebu City nag-una na sab sa dengue

CEBU, Philippines - Subling nabutang sa dunay labing daghang kaso sa sakit nga dengue ang Cebu City gikan sa ikaduhang pwesto sa talaan sa nakalabay’ng bulan sa Enero ning tuiga.

Ang Dumaguete City maoy nag-unang dunay labing daghan og nasakit og dengue sa  milabay’ng bulan, apan sa labing uwahing monitoring sa Regional Epidemiology Surveillance Unit-7 nga gihimo niadtong Pebrero 9 hangtud sa 15 naunhan na kini karon sa Cebu City. Sa 458 nga natalang sakit nga dengue sa tibuok Central Visayas sa maong period, 91 niini gikan sa Cebu City.

Samtang duna say duha ka namatay gikan sa probinsya sa Negros Oriental--usa ka 2-anyos nga batang lalake gikan sa Dumaguete City ug 10-anyos nga batang lalake gikan sa Bais City.

Ikaduha sa listahan ang Lapu-Lapu City nga dunay 78 ka kaso samtang ikatulo na lang ang Dumaguete City nga dunay 58 ka kaso diin usa ang namatay. Laing lugar sa Negros Oriental, ang Sibulan, ang nakakuha sa ikaupat nga luna diin dunay 26 ka kaso ug gisundan sa Minglanilla nga dunay 24 ka kaso.

Ikaunom ang Talisay City, nga dunay 15 ka kaso samtang Guihulngan sa Negros Oriental dunay 13 ka kaso.

Ang kinatibuk-ang kaso nga na-report sa Central Visayas  miabot sa 458, nga  85.4 porsiyentong mas ubos kun itandi sa susamang panahon sa niaging tuig nga miabot og 3,145.

Sa niaging buwan, ang Dumaguete City nga dunay 37 ka kaso sa kinatibuk-ang 187 ka kaso sa tibuok Central Visayas. (/EIM)(BANAT NEWS)