Pagtukod og airport terminal malangan

CEBU, Philippines - Malangan pa g’yud og dugay ang pagtukod sa bag-ong passenger terminal ug ang pagpanindot sa kasamtangan nga terminal building sa Mactan Cebu International Airport.

Giklaro ni Airport General Manager Nigel Paul Villarete nga dili tinuod nga nakadeklarar na og kontraktor nga “winning bidder” ang Bids and Awards Committee sa Department of Transportation and Communication (DOTC) aron motukod sa proyekto.

Matud ni Villarete nga gidiskutir pa sa mga sakop sa Bids and Awards Committee (BAC) sa DOTC ang awhag sa Filinvest-Changi Airport nga maoy second highest bidder nga sutaon ang kapasidad sa GMR-Megawide Consortium nga miduso og taas nga tanyag sa pagtukod sa proyekto.

Sa ilang suwat ngadto sa BAC, ang tagdumala sa Filinvest-Changi Airport mitug-an nga ang GMR adunay mga proyekto nga pagdumala og airport terminal didto sa Maldives ug New Delhi, India nga nakasugat og kontrobersiya. Ang mga kongresista sa Sugbo nagkahiusa pag-awhag sa mga sakop sa House Committee on Transportation nga mohimo og Congressional Inquiry kabahin sa isyu nga gibutyag sa Filinvest-Changi Airport.

Si Kongresista Raul Del Mar (Cebu City North District) miingon nga ang Bids and Awards Committee (BAC) padayon pa nga mihimo og post-evaluation sa mga dokumento aron pagsuta sa “financial capability” sa nakatanyag og taas nga kontrata.

Ubos sa kasabutan unya nga pirmahan sa kagamhanan pinaagi sa DOTC ug sa makadaug nga kontraktor nga sila ang mogasto paghimo og bag-ong terminal building ug mopaanindot sa kasamtangan nga airport terminal, dayon sila ang modumala sulod sa 25 ka tuig.

Matud sa pipila ka kongresista nga angay’ng pilion g’yud ang kontractor nga labing takus tugyanan sa daku nga proyekto nga pagserbisyo sa mga pasahero sa abyon diha sa ikaduha nga labing daku nga airport sa nasud. (BANAT NEWS)