CEBU, Philippines - Giplano karon sa kadagkoan sa Bureau of Jail Management and Penology (BJMP) ang pagpatukod pa og dugang building alang sa Mandaue City Jail sa Barangay Looc ug tungod niini dunay mga “informal settlers†nga maapektohan. Si Chief Inspector Gil Inopia nga maoy warden sa Mandaue City Jail miingon nga dili hinuon madali ang pagpatuman sa maong plano sanglit mag-agad man sila sa gahin nga salapi gikan sa ulohan nilang buhatan.
Matud ni Inopia nga gipaniguro hinuon sa kagamhanan sa Mandaue ang pagtabang sa BJMP sa higayon nga mahingpit na sa pagpatuman ang giplanong pagpalapad sa bilanggoan.
Dugang sa warden si Mayor Jonas Cortes miawhag na kanila sa pagpangita og luna nga magsilbing relocation site sa 50 kapin ka pamilya nga nag-ukopar sa maong luna nga ilang tukoran og bag-ong bilanggoan.
Si Tonypet Juanico nga maoy pangulo sa Housing Urban Development Office (HUDO) sa Mandaue miingon nga ang mga informal settler sa Barangay Looc nalakip sa ilang giplano nga hatagan og luna nga ilang kabalhinan.
Gipasabot ni Juanico nga ang 6.5 ka ektarya nga luna sa barangay Paknaan maoy nahimong relocation site sa mga informal settler nga nagpuyo sa daplin sa Mahiga Creek ug Butuanon River ug mokabat lamang sa 1,200 ka pamilya ang makaukopar niini. (/RUB)(BANAT NEWS)