CEBU, Philippines - Tawo nga gitoohan nga giatake sa high-blood pressure samtang naligo sa dagat nalumos ug namatay didto sa Barangay Colasi, Samboan kaniadtong Huwebes sa buntag.
Ang namatay mao si Cupio Orcollo, 36, taga Sitio Calasa, sakop gihapon sa Barangay Colasi.
Si PO3 Sepjenrey Roda, sakop sa Samboan Police Station, miingon nga ang nalumos kuyog kini sa iyang ig-agaw nga si Apolinar Aniñon nga nagpalit og isda sa baybayon. Matud ni PO3 Roda nga si Orcollo nananghid ni Aniñon nga pabantayan usa niya ang isda nga iyang gipalit kay maligo usa siya kadiyot sa dagat apan wala na kini mahibalik.
Nakit-an na lang nga ang lawas ni Orcollo naglutaw na sa dagat nga wala na’y panimuot.
Daling mirespondi ang mga polis uban sa usa ka ambulansya ug mga kawani sa Municipal Health Office nga sila si Roselinda Gerson ug si Mercedita Cabalida.
Matud pa nga ang namatay nalumos na usab kaniadto dihang giatake sa high-blood apan naluwas pa atol sa mao nga higayon. (/RUB)(BANAT NEWS)