Kampanya kontra insurhensiya gipaagi sa seminar
CEBU, Philippines - Giseminar sa mga sakop sa Regional Public Safety Battalion 7 ang mga molupyo sa barangay Bato sa dakbayan sa Toledo kalabot sa Internal Security Operation ug Safety and Security Awareness niadtong miaging Sabado.
Ang tigpamaba sa RPSB 7 PO1 Edwin Catamco miingon nga ang ISO seminar magtudlo sa mga residente kabahin sa posibleng presensya sa mga walhong grupo sa usa ka lugar.
Ang maong kalihokan gipangulohan ni Sr. Insp. Aurora Rayos nga gitambongan sa 300 ka mga residente lakip na sa mga tinun-an sa elementarya sa Bato ug mga ginikanan.
Lakip na sab nga gihatag nga seminar sa maong mga polis mao ang Responsible Parenthood diin gitudloan ang mga ginikanan og mga tips aron mamahimo silang maayong mga ginikanan ngadto sa ilang mga anak.
Ang RPSB nakapahigayon na og upat ka mga susamang seminars, ang tanan gihimo sa mga hilit nga lugar nga wala pa kaayo maabot sa mga serbisyo sa gobyerno.
“Ang ISO sir mao gyud na ang number one nato nga gikampanya to check nga naa bay kalihokan ang mga rebelde,†matud ni Catamco.
Sumala pang Catamco ang mga hilit nga dapit maoy sagad adtoan sa mga rebelde. Sagad sa mga rebelde anha manguha og recruits sa mga hilit nga dapit nga diin dali ra kaayong mahaylo ang mga tawo.
Gawas sa ISO, gitudloan usab nila ang mga residente. Sumala pa ni Catamco nga ang Safety Awareness Seminar nga ang tumong mao ang pagtudlo sa katawhan sa angayang buhaton aron di mabiktima sa mga krimen. (BANAT NEWS)
- Latest
