Upat naangol sa aksidente

CEBU, Philippines - Upat ang angol lakip na sa tulo ka menor de edad nga lalaki ug babaye sa managlahi nga disgrasya sa kadalanan sa lalawigan sa Sugbo.

Angol ang usa ka lalaki nga nagmaneho sa usa ka motor human kini nabangga sa gikasugat nga bus sa usa ka blind curve sa barangay Bugas sa lungsod sa Badian. Ang drayber sa motor naila nga si Jackstill Sab-a, 18, taga Busay, Moalboal.

Samtang ang drayber sa bus naila nga si Wiliam Ostia, 41, taga Taytayan sa dakbayan sa Bogo. Base sa imbestigasyon sa kapolisan nga nagkasugat ang motor ug ang Ceres nga bus ug pag-abot niini sa kurbadahon nga bahin sa dalan nawad-an og kontrol si Sab-a hinungdan nga nabangga kini sa Ceres bus.

Grabing kadaot ang naangkon ni Sab-a sa iyang dapi-dapi hinungdan nga gidala kini sa Badian District Hospital. Si Ostia gitanggong na sa karsel alang sa pagpasaka og kaso.

Samtang angol ang duha ka dalagita ug ang drayber sa motor nga usa usab ka menor de edad human mabangga-i ang motor nga ilang gisakyan sa usa ka trak diha sa barangay Saavedra sa lungsod sa Moalboal.

Ang mga naangol mao si Alfredo Pocong, 17, ug ang angkas niini nga sila si Niña Pocong, 15 ug Windel Gallardo, 15  nga mga molupyo sa barangay Saavedra sa Moalboal. Base sa imbestigasyon sa kapolisan, padulong sa Moalboal proper ang mga biktima dihang nadumbolan sa nagsunod nga trak nga gimaneho ni Alexander Ibay, 42, nga mag-deliver unta og softdrinks.

Matud pa sa mga saksi kurbadahon ang dalan sa maong dapit ug kusog ang dagan sa trak hinungdan nga naigo niini ang luyo nga bahin sa motor nga gisakyan sa mga biktima hinungdan sa ilang pagkatumba.

Daling gidala sa Badian District Hospital ang mga biktima apan gibalhin sila sa Vicente Sotto Memorial Medical Center tungod sa kagrabe sa kadaot nga ilang naangkon. Ang drayber nga si Ibay gikatakdang pasakaan og kaso karong adlawa.  (BANAT NEWS)