PCAC naalarma sunod-sunod nga krimen sa siyudad

CEBU, Philippines - Nunot sa mga nagsunod nga mga pagpamusil nga nahitabo sa siyudad sa Sugbu, ang Police Coordinating Advisory Council (PCAC) pinangulohan ni Bise Mayor Edgardo Labella mimando sa kapolisan sa pagsumitir og ‘powerpoint presentation’ sa ilang labing uwahing “crime situation update” sa siyudad.

Gusto usab sa PCAC nga mahibaw-an ang sitwasyon sa peace and order sa siyudad ug kung unsa nay mga gipanghimo sa kapolisan aron mapakgang ang mga krimen.

Si Labella naalarma niining mga pagpamusil sa siyudad nga miresulta sa pagkamatay ug pagkaangol sa mga molupyo.

Wala makatambong si Cebu City Police Office director, Sr. Supt. Noli Romana sa maong gipatawag nga meeting sa PCAC, apan girepresentahan siya ni Chief Insp. Arnel Banzon.

Si Banzon sa iyang bahin miesplikar sa PCAC nga sagad sa maong mga pagpamusil aduna nay mga lead kun si kinsa ang mga responsable ug ilaha na kini karong gisundan.

Gipahibalo usab ni Banzon sa PCAC nga ang CCPO kulang sa ilang mga sakyanan nga magamit sa pagpatrolya. Ang CCPO aduna lamang dose ka mga patrol cars, kuwang ang kahimanan sa komunikasyon sama sa handheld radios ug kuwang usab ang polis.

Ang CCPO aduna ray kapin usa ka libong polis aron mobantay sa dili momenus usa ka milyon ka mga residente ug transients nga nia na manginabuhi dinhi. Ang ideyal unta nga bantayan sa kada usa ka polis 500 ka tawo lamang.

Base sa May 1, 2010 Census of Population and Housing (CPH) ang Cebu City adunay 866,171 nga populasyon. Si Labella mimando sa CCPO nga mopresentar sa maong powerpoint karong adlaw nga Martes atol sa ilang sinemanang panagtigom ug pagka-adlaw nga Miyerkules kinahanglang mopresentar usab sila niini atubangan sa Konseho aron masayran sa mga opisyal sa siyudad ang sitwasyon sa peace and order karon sa dakbayan.  (BANAT NEWS)