‘Drug pushers’ nadakpan
CEBU, Philippines - Duha ka tawo ang nadakpan tungod sa paghupot og shabu sa dalan F. Ralota sa barangay Poblacion, dakbayan sa Danao sa wala pa moudtong tutok niadtong Biyernes.
Ang nadakpan mao sila si Silvestre Makipig, 38, taga barangay Dawis, Carmen ug Oliver Clerego Palma, 35, taga Sto. Tomas Village, Barangay Tuburan Sur, dakbayan sa Danao.
Si SPO4 Aretio Espina sa kapolisan sa Danao miingon nga nagpatrolya ang grupo ni PO3 Phil Restauro dihang ilang nasigpatan ang mga suspetsado nga nagdalidali og lakaw ug kadudahan ang mga lihok.
Tungod niini, ilang gisita ug gisukitsukit. Tungod kay wala magkadimao ang ilang tubag girekisa nila ang bulsa sa duha ug diha nila kini nakuhaan og tagsa ka paketeng shabu hinungdan sa ilang pagkasikop.
Gikatakdang pasakaan nila og kaso nga kalapasan sa Republic Act 9165 o Comprehensive Dangerous Drugs Act of 2002.
Samtang usa ka Dominador Tuñacao,38, ang gidakop sa kapolisan diha sa dalan A. Soriano, Barangay Centro, dakbayan sa Mandaue niadtong Valentine’s Day kay nasakpang naghupot og .38 kalibre nga revolver nga may tulo ka bala.
Si PO1 Jerome Lendio, sakop sa Presinto 1 sa Mandaue City Police Office (MCPO) miingon nga nasigpatan sa nagpatrolyang mga polis ang suspetsado nga dunay nagbagal sa luyo ug sa pagrekisa nasuta nga kini usa ka armas. Way napakitang papeles sa armas ang suspek maong siya gidakop. (/EIM)(BANAT NEWS)
- Latest
