CEBU, Philippines - Ang kagamhanan sa Talisay gikatakdang mopahigayon og seminar ngadto sa 22 ka barangay sa siyudad kabahin sa pagtubag sa emerhensiya sa katalagman human sa gipalabang nga resolusyon aron ipa-activate na ang Barangay Disaster Risk Reduction and Management Committee. Si Konsehal Danny Caballero mibutyag sa Banat News kagahapon nga ang peace and order council nagpahigayon na og meeting niadtong milabay’ng semana kabahin sa maong katuyoan.
Matud ni Caballero nga ang peace and order council mopahigayon og training ngadto sa mga opisyal sa kabarangayan sa siyudad kabahin sa pagtubag kun dunay mahitabong katalagman diha sa ilang mga barangay.
Karong sunod semana gikatakda ang pagpadala og suwat ngadto sa kabarangayan aron sila makapangandam sa nahisgutang programa.
Matud usab ni Caballero nga posibleng mopalabang siya og resolusyon sa sunod semana aron makapangayo og budget ngadto sa mayor nga gamiton sa pagpahigayon og training. Si Caballero miingon nga ang barangay isip kinagamyang political body sa nasud, duna kini dakung papel sa komunidad ilabi na sa pagtubag sa mga panginahanglan sa katawhan panahon nga may katalagman.
Dugang sa Konsehal nga kung mabansay ang mga barangay sa disaster awareness mamenusan gyud ang danyos ug casualties. (/EIM)(BANAT NEWS)