CEBU, Philippines - Usa ka kalabira sa tawo ang napalgan sa duha ka ginang didto sa Sitio Banika, Barangay Lahug, dakbayan sa Sugbo.
Matud pa sa imbestigador sa Homicide Section sa Cebu City Police Office nga si SPO1 Ruth Violango, ilang gibanabana nga kapin na sa napulo ka tuig nga namatay ang maong tawo.
Ang kalabira nakit-an diha sa kasagbotan nga bahin sa maong lugar. Ang ginang nga si Joan Acson daling mitug-an sa iyang bana sa maong kalabira kinsa dali usab mipahibalo sa kapolisan.
Matud pa ni Violango nga gabii na niadtong Biyernes naugkat ang maong kalabera tungod kay gibuliboran na kini og mga sagbot ug mga bagon.
Si Violango miingon nga ila pang ipatan-aw sa PNP Crime Laboratory Service-7 ang kalabira kung iya ba kini sa lalaki o sa babaye ug aron masusi kung unsay posible nga gikamatyan.
Susihon usab sa kapolisan pinaagi sa pagsubay sa record sa mga missing nga tawo sa nakalabay’ng katuigan. (/EIM)(BANAT NEWS)