Bayot nga bugaw sa online nadakpan

CEBU, Philippines - Nasikop sa kapolisan ang usa ka bayot nga gidudahan nga usa ka cyberporn operator atol sa entrapment operation nga gihimo sa usa ka hotel sa dakbayan sa Sugbo sa miaging gabii.

Ang nasikop naila nga si Eul Vincent Rodriguez, 27, molupyo sa Barangay Tabunok, dakbayan sa Talisay.

Nasikop si Rodriguez human kini modawat sa P10 mil nga cash bugti sa serbisyo sa usa ka 14-anyos nga bayot alang sa pagpakighilawas sa usa ka police decoy.

Matud ni Insp. Sheryl Baustista nga ang ilang decoy nangita og usa ka menor de-edad nga bayot ug mikontak ni Rodriguez nga mag-abot sila sa hotel.

Dihang naabot na sa hotel, si Rodriguez mikuha sa P10 mil ug mipresentar sa menor de edad nga bayot ngadto sa decoy. Daling gidakop ang suspetsado sa mga sakop sa Regional Intelligence Division (RID) ug sa Regional Anti-Human Trafficking Task Force.

Matud pa nga si Rodriguez mao ang bugaw sa mga bayot ug iyang trabaho ang pagpangita og customer sa online.  Sagad sa iyang mga kustomer didto niya makita sa mga social networking sites. Matud pa ni Bautista nga si Rodriguez gipanid-an sab diay sa US Immigration and Customs Enforcement tungod sa iyang pagpamugaw.

Dihang nahinabi sa mga tigbalita si Rodriguez iyang giangkon nga siya ang tigdala sa mga bayot ngadto sa iyang mga kliyente.

Matud ni Rodriguez nga nakat-on ra siya niini nga negosyo sa iyang mga silingang mga bayot nga karon nahimo na’ng kwartahan. “Nahibung ko nadato man akong mga silingan nga bayot, mao na nga niapil ko,” matud ni Rodriguez.

Miingon si Rodriguez nga ang 14-anyos iyang “alaga” dili lang alang sa mga foreigner kun dili alang sab sa mga pageants.

Adunay 15 ka menor de edad nga mga bayot nga iyang giatiman ug iyang ibaligya ngadto sa mga kustomer nga magkinahanglan og bayot. (/EIM)c (BANAT NEWS)