CEBU, Philippines - Nasakmit sa mga sakop sa Criminal Investigation and Detection Group 7 ang P1.2 milyones nga kantidad sa shabu dihang gironda nila ang usa ka balay didto sa dakbayan sa Tagbilaran City sa Bohol.
Nadakpan usab sa kapolisan ang gitoohang drug pushers nga sila Sherwin Lofranco Bautista ug si Alma Paculba Manlangit, matud pa adunay relasyon.
Matud pa nga dihang giimplimetar sa mga CIDG agents ang search warrant sa panimalay ni Bautista ilang nasuta nga gawas sa armas nga subject sa maong search warrant duna pay drugas nga nakita ang mga polis.
Nakuha sa mga polis ang pipila ka pakete sa shabu nga gibana-bana nga mokabat og 300 gramos ug usa ka kalibre .45 nga pistola.
Ang hepe sa CIDG7 nga si Senior Supt. Ritchie Posadas miingon nga ang iyang mga sakop didto sa Bohol nagsige na og paniid sa suspek sud na sa duha ka semana tungod sa report nga nalambigit kini sa mga illegal nga kalihokan.
Gawas sa armas og drugas, nakuhaan ‘sab og mga gambling paraphernalia ug P5 mil nga gituohang halin niini sa iyang illegal nga kalihokan. (/EIM)(BANAT NEWS)