CEBU, Philippines - Ang Land Transportation Franchising and Regulatory Board (LTFRB) milusad og kampanya nga gitawag nila og “Oplan I Love You Virus" atol sa pagsaulog sa Valentine’s Day kagahapon.
Gitumong kini aron pagsumpo sa mga abuso sa taxi drivers nga mopausbaw sa pletehan sa mga sumasakay pinaagi sa pagpatoo nga ang dugang bayranan bayad sa ilang pagpaabot.
Matud ni LTFRB-7 Regional Director Ahmed Cuizon nga ang iyang mga sakop gibahin pagdistino sa north ug south areas dinhi sa dakbayan pinaagi sa pagpamutang og tarpaulin ug streamers nga nagpahibalo sa mga sumasakay nga makasumbong sila kun patungan og dugang bayranan ang ilang pletehan.
Gawas sa overcharging sa pletehan, giaghat usab ni Cuizon ang mga commuters pag-report kun arogante ang driver, ilabi na kun ang sakyanan walay prangkisa. (/RUB) (BANAT NEWS)