CEBU, Philippines - Ubay-ubay na nga Talisaynon ang nagbagulbol tungod kay ang Talisay Rescue Emergency Action Team (TREAT) giingong dili moresponde kung adunay mangayo og tabang panahon sa emerhensiya sa panglawas o kung adunay maghatud sa tambalanan.
Ang ubang personnel sa TREAT nakatapos kini og kursong nursing ug gawas niini napaubos usab sila kaniadto sa siyudad og bansay-bansay kabahin sa pagtubag sa emerhensiya. Apan pila na ka buwan ang nakalabay daghang nagbagulbol kay giingong pirmeng mobalibad ang TREAT pagresponde sa mga emerhensiya kay wala sila’y sakyanan o bisan na lang ambulansiya nga magamit.
Usa sa mireklamo mao ang pamilya ni Mario Cañeda nga gipusil sa duha ka wala mailhing kriminal niadtong Huwebes sa buntag didto sa Barangay Mohon.
Ang mga paryente ni Cañeda nasagmuyo tungod kay kapin sa oras silang naghuwat sa TREAT aron unta ipasakay sa ambulansiya ang biktima ug dad-on sa tambalanan apan walay mitungha.
Ang biktima gisakay na lang kini sa multicab sa barangay paingon ngadto sa TCDH apan patay na.
Si Talisay City Public Information Officer (PIO) Vincie Monterde nga nahinabi sa Banat News kagahapon mibutyag nga ang duha ka ambulansiya sa TREAT pulos guba.
Ang bag-ong ambulansiya nga nabangga niadtong miaging tuig hangtud karon wala pa gyud maayo mao nga gimando sa mayor nga ipa pull-out na lang gikan sa car dealer nga gipalitan niini aron ang siyudad na lang ang mopaayo.
Dunay karaang ambulansiya ang siyudad nga gikatakdang ipagawas na sa motorpool sa siyudad kagahapon ug duna ‘say pickup nga gikan sa opisina sa mayor nga mahimong gamiton sa TREAT. (/EIM)(BANAT NEWS)