CPA mopalayas sa nasunogan

CEBU, Philippines - Midangop kagahapon didto sa Cebu City Hall ang kapin sa 20 ka pamilya nga nabiktima sa sunog sa Warwick-Barracks market sa Barangay Ermita nga anaa karon gipahimutang sa tiilan sa taytayan sa South Coastal Road.

Nagpatabang sila kang Mayor Michael Rama kay giawhag sila sa Cebu Port Authority (CPA) nga palayason sa ilang nahimutangan tungod kay ang mao nga dapit duol sa Compania Maritima ila sa CPA.

Si Mayor Rama mitakda nga makigtigum sa kadagkoan sa Division for the Welfare of Urban Poor (DWUP), Department of Social Welfare and Services (DSWS) ug sa mga opisyal sa Barangay Ermita aron sabotan unsay himoon nila nga pagtabang sa mga biktima sa sunog.

Ang mao nga mga nasunogan gihiklin sa ilawom sa tulay kay ang Warwick-Barracks gipahawanan ni Mayor Rama aron ang kabahin niini himoon na nga parking area sa mga sakyanan. Ang katunga sa Warwick Barracks mahimo na nga kabahin unya sa Freedom Park Market kay ang karsada El Felibusterismo nga nag-uwang sa Warwick-Barracks ug Freedom Park ipasibog sa mayor.

Ang tumong niini mao nga molapad ang Freedom Park ug kadtong tinuod g’yud nga mga naninda sa Warwick-Barracks adto sila didto ipahimutang samtang kadtong nagpuyo lang dili na sila pabalikon.  (BANAT NEWS)