CEBU, Philippines - Miabot og 3,937 ka tawo ang nangamatay dinhi lang sa dakbayan sa Sugbo kaniadtong miaging tuig apan ang mao nga gidaghanon mas ubos kini kun itandi sa statistics sa miaging 2012.
Ang rekord sa City Health Department nagpakita nga ang gidaghanon sa mga nangamatay kaniadtong 2012 miabot og 4,066 apan dili kaayo magkalagyo ang statistics kun itandi sa tuig 2013.
Dili hinoon kabalak-an kay bisan og daghan ang nangamatay, apan mas daghan usab ang nahimugso hinungdan nga kanunay g’yud nga magtubo ang atong populasyon.
Matud ni Cebu City Health Officer Daisy Villa nga 984 ang namatay sa cardio-vascular diseases sama sa pag-atake sa sakit sa kasing-kasing. Ang sunod nga sakit nga daghan og namatay mao ang pneumonia nga mikalas og 877 ka kinabuhi.
Dul-an usab sa 200 ang namatay sa pagpamusil, pagpanunggab ug ubang mga medico-legal nga mga kaso.
Si Dr. Villa nagkanayon nga aron malikayan g’yud ang cardio-vascular diseases kinahanglan nga dili magpasagad sa pagkaon.
Gipahinumdoman ni Dr. Villa ang katawhan nga kinahanglan usab ang kanunay nga pag-ehersisyo mata’g adlaw aron magpabilin ang kabaskog sa ilang panglawas.
Ang kanunay nga pag-inom og soft drinks makahatag usab og kadaot sa panglawas, ilabi na sa mga tawo nga hamtong na ang pangidaron. (BANAT NEWS)