Polis nga ‘nanulis’ miprenda‘s armas

CEBU, Philippines - Posible nga matangtang sa katungdanan si PO2 Ronilo Manuel nga unang gipasanginlang nanulis sa usa ka babaye sa milabay’ng gabii tungod kay giingong giprenda niini ang iyang service firearm.

Si Chief Inspector Ma. Aileen Recla, ang hepe sa Investigation and Detection Management Branch sa Cebu City Police Office miingon nga iya nang gipatubag si PO2 Manuel sa iyang kaso nga administratiba.

Mag-atubang og tulo ka kasong administratiba si PO2 Manuel, kini mao ang kaso kabahin sa iyang pag-AWOL (absence without official leave), ikaduha ang pagprenda niini sa iyang armas, ug ang ika-tulo ang pasangil nga pagpanulis.

Si Manuel gimandoan pagtubag sa pasangil sulod sa 72 ka oras sugod kagahapon sa buntag.

Lakip sa gipatubag ni Recla mao ang immediate superior ni Manuel sa Cebu City Public Safety Company.

Matud pang Recla nga tungod sa kabug-at sa kaso nga giatubang ni PO2 Manuel posible nga mataktak gyud kini sa pagkapolis.

Sumala pa ni Chief Insp. David Señor ang hepe sa Police Station 2 nga positibo g’yud nga giila sa biktima si PO2 Manuel  nga maoy nanulis busa kinahanglan g’yud siyang prisohon.

“He was positively identified so mapriso jud siya ani if proven guilty,” matud ni Señor.

Gawas kang PO2 Manuel, gipatubag usab ni Recla ang laing polis nga gipasanginlang mikulata sa usa ka waiter sulod sa usa ka restobar sa Osmeña Boulevard.

Si PO2 Hoseph Tabo-tabo gihatagan sab ni Recla og 72 oras alang sa pagsumitir sa iyang tubag sa kasong administratiba nga iyang giatubang bisan pa man wala na mokiha ang waiter.  (BANAT NEWS)