Lapu-Lapu dili magpabayad sa kadaut

CEBU, Philippines - Walay danyos nga gipangayo ang kagamhanan sa dakbayan sa Lapu-Lapu ngadto sa 2Go Shipping Lines bisan pa nga nakahatag kini’g kadaut sa ilang kalikupan tungod sa pagkalunod sa M/V Thomas Aquinas sa miaging tuig.

Mas labaw’ng gipasalamatan ni Lapu-Lapu City Mayor Paz Radaza ang mga mitabang sa paghimo og dinaliang aksiyon aron dili mokatap ang "oil spill" sa mga bakhaw ug ubang mga tourist destinations sa dakbayan.

Giangkon ni Mayor Radaza nga grabeng naapektohan sa oil spill ang Barangay Kalawisan apan tungod sa gihimong "Adopt a work program" sa DSWD sa Lapu-Lapu nahatagan og igong suporta ang mga mananagat nga naapektuhan sa oil spill.

Ang dali nga pagresponde sa mga Oponganons sa paghimo og "chorizo boom," usa ka temporaryong oil spill boom nga gihimo gikan sa buhok sa mga piniriso ug sa mga barber shop. Tungod niini wala kaayo mangamatay ang mga bakhaw nga sagad maoy gipuy-an ug kuhaanan   sa mga isda atol sa pagkalunod sa M/V Thomas Aquinas.

Ang lungsod sa Cordova nangayo og P127 milyones nga danyos ngadto sa 2Go Shipping tungod sa pagkagusbat sa ilang mga bakhawan apan hangtud karon wala pa kini tagda sa tag-iya sa nalunod nga barko. (BANAT NEWS)