LTO Lapu-Lapu may tambag sa mga drayber

CEBU, Philippines - Nahinangop kaayo ang hepe sa Land Transportation Office (LTO)-Lapu-Lapu City Branch nga naronda sa kapolisan ang tighimo og mga peke nga lisensya diha sa dalan Colon.

Si Aurea Angcay naglaum nga mahanaw na unta ang pagpayuhot og mga peke nga lisensya human maronda sa kapolisan ang usa ka ID shop sa dalan Colon.

Matud ni Angcay nga ang LTO sa dakbayan sa Lapu-Lapu gihugpaan usab kaniadto og daghang fixers apan anam-anam kining nagkaminus dihang mibalik siya paglingkod sa katungdanan.

Ang gihimo ni Angcay mao ang pagpasidaan sa iyang mga sakop nga dili modawat ug transaksiyon kun dili g’yud ang aplikante sa driver’s license o rehestro sa sakyanan ang modala sa papeles.

Pasabot ni Angcay nga "kung wala’y modawat nga kawani sa LTO sa illegal nga transaksiyon, wala’y fixers nga magyampungad."

Matud ni Angcay nga tungod sa iyang kaestrikto nakadawat siya og daghang hulga apan iya ra kining gipasagdan ug karon wala na kaayo siya maproblema kabahin sa mga fixers.

Naabtan sa reporter sa Banat News nga si Angcay mismo maoy mi-check sa mga papel sa mga mikuha ug driver’s test, aron  wala’y trampas sa mga palusot sa resulta.

Naglaum unta si Angcay nga ang nahitabo sa Nigerian national nga nakapalit og peke nga driver’s license magsilbi unta nga leksyon sa mga tawo nga dili gayud maayo ang pag-transact sa mga fixers.    (BANAT NEWS)