Mga drug suspect nadakpan
CEBU, Philippines - Nadakpan sa kapolisan atol sa buy-bust operation ang duha ka suspetsadong drug pusher ug nasakmitan sila’g pinakete nga shabu ug armas.
Si Niño Bugtai, 33, nadakpan didto sa Sitio Sambag, Barangay San Vicente, Liloan ug nasakmitan ang suspek og walo ka pakete nga shabu apan nakaeskapo ang iyang kaubang drug pusher.
Si SPO3 Octavio Dela Paz, sakop sa Liloan Police Station, miingon nga ang kaubang pusher ni Bugtai nga si Ranulfo Ebarola mao gayud unta ang ilang tumong sa buy-bust operation apan nakamaneho pag-ikyas.
Matud pa nga si Ebarola maoy midawat sa kuwarta apan dihang nakamatikod sa mga polis mikaratil kini pagdagan mao nga si Bugtai ra ang nadakpan nga maoy nagtunol sa shabu.
Laing nadakpan sa kapolisan sa pagpayuhot og shabu mao si Yehpeth Bontilao, 20, taga Sitio Sta. Maria, Barangay Pusok, dakbayan sa Lapu-Lapu.
Ang team sa kapolisan nga gipangulohan ni Senior Inspector Junnel Kaadlawon nga maoy hepe sa Presinto 5 sa Lapu-Lapu City Police Office (LLCPO) maoy mihimo og buy-bust operation nga miresulta sa pagkasikop ni Bontilao.
Nakuhaan si Bontilao og duha ka paketeng shabu ug 22 kalibre nga armas nga adunay tulo ka bala.
Ang dinakpan nga si Bontilao pasakaan og kaso nga paglapas sa Comprehensive Dangerous Drugs Act ug kalapasan sa Firearms Law kay wala kini makapakita’g lisensya sa armas. (BANAT NEWS)
- Latest
