CEBU, Philippines - Patay ang usa ka batang lalaki human kini natagak sa usa ka lungag nga dunay napundong tubig sa ulan sa miaging hapon diha sa sitio Gezo, barangay Colon sa dakbayan sa Naga. Ang biktima naila nga si January Puerto Jr. 3, gituohang nalumos ang bata human aksidenteng natagak sa maong lungag nga may giladmon nga upat ka tiil. Matud pa sa report sa Cebu Provincial Police Office nga ang maong lungag nahimutang sa construction site sa tukorong MDC Subdivision sa Transco Compound duol sa ilang balay sa maong lugar.
Daling gidala sa Minglanilla District Hospital ang bata apan gideklarar kini nga dead on arrival sa mga miatimang doktor.
Si PO2 Jim Canabe, desk officer, miingon nga nakit-an pa ang bata nga nagkuyog sa iyang mga higala ug sa iyang inahan nga si Gesarie Puerto.
“Ang kanang kinawtan nabutangan na’g tubig tungod adtong sige og uwan unya lawom na man na para sa mga bata,†sumala pa ni Canabe.
Naghulat pa ang kapolisan sa posibleng lakang nga himuon sa pamilya sa bata batok sa maong construction site. (/EIM)(BANAT NEWS)