4-anyos napaig
CEBU, Philippines - Napaig ang usa ka batang babaye sa sunog nga miigo sa Barangay Punta Princesa sa dakbayan sa Sugbo sa alas 12:45 kagahapon sa udto.
Ang napaig naila nga si Estella Jean Romero, 4, nga nagduwa sa ikaduhang andana sa ilang balay.
Matud pa sa uyoan sa biktima nga si George Herbella nga ang bata gikan pa nga naniudto unya misaka kini sa ikaduhang andana aron magduwa.
“Nagduwa ang bata, wa may kuryente bodega man na, gipakaon pa ‘to nako unya ninggawas,†sumala pa ni Herbella.
Nabantayan na lang ni Herbella nga baga na ang aso sa ilang balay ug pagtan-aw niini sa ikaduhang andana nagsiga na kini. Dugang ni Herbella nga nakit-an pa niya ang iyang pag-umangkon nga naa sa taas ug iya kining gitawag apan wala na kini makahimo tungod kay kusog na kaayo ang kalayo.
Matud pa ni Herbella nga nangayo siya og tabang sa ilang mga silingan apan gitan-aw lang siya niini.
“Ang maguwang akong gipadagan sige ko’g singgit tabang tabang, ang mga tawo nagtan-aw ra man,†dugang ni Herbella.
Misulay sab si Herbella sa pagkatkat sa hagdanan apan dili na gyud niya masugakod ang grabeng kainit sa kalayo tungod kay miulbo na man kini og maayo.
Nakaplagan na lang nga napaig na ang lawas sa bata apan ilaha gihapon kining gidala ngadto sa Cebu City Medical Center (CCMC) apan patay na kini dihang nahidangat sa maong tambalanan.
Ang amahan sa biktima nga si Mike wala sab nianang tungora sa ilang balay sanglit nag-ayo man kini sa iyang motor sa gawas.
Wala usab ang inahan sa bata tungod kay nagtrabaho kini sa Day Care Center sa barangay Punta Princesa.
Ang maong sunog miigo sa alas 12:45 sa udto kagahapong adlawa sa likod nga bahin sa Punta Princesa Barangay Hall ug kilid sa Punta Princesa Elementary School ug napalong ra pud dayon kini sa mga silingan. Si FO3 Emeliano Edaño mibana-bana nga mikabat og P50 mil ang danyos sa maong sunog nga niugdaw sa usa ka balay ug naka-damaged sa kasikbit nga balay. (/EIM)(BANAT NEWS)
- Latest
