PCG nangandam gumikan sa bagyo

CEBU, Philippines - Gialerto na ang tanang mga station sa Philippine Coast Guard dinhi sa lalawigan sa Sugbo tungod sa pagsulod na kagahapon sa hapon sa Bagyong Basyang sa Philippine Area of Responsibility.

Sumala pa ni Cebu Coast Guard District Commander Rodulfo Villajuan iya nang gihatagan og abiso ang 13 ka mga detachment sa Coast Guard dinhi sa Sugbo labot na sa pag-abot sa bagyong Basyang. Kini ilabi na nga nalakip sa naapektohan mao ang Kabisay-an ug ingon man ang Mindanao area.

Iya usab nga gihatagan og kamanduan ang mga detachment sa Coast Guard nga modili dayon sa mga barko ug motorbangka sa pagbiyahe sa higayon nga mopagawas na og public storm warning ang Pag-asa Mactan.

Ang pangulo sa Philippine Atmospheric Astronomical and Geophysical Services Administration (PAGASA) -Mactan nga si Oscar Tabada miingon nga nahimo nang bagyo ang Basyang sa wala pa kini makasulod sa Philippine Area of Responsibility.

Iyang gitataw nga ang maong bagyo may dalang kusog nga hangin ug ulan apan hinay kining nagairog sa silangang bahin sa Northern Mindanao ug mopaingon sa Palawan.

Samtang ang kagamhanan sa syudad sa Sugbo nangandam na usab sa pag-abut sa maong bagyo.

Sumala pa ni Acting Mayor Edgardo Labella ila nang gipatawag ang representante sa Pag-asa Mactan ug kadagkuan sa Cebu Coast Guard aron paghatag og briefing sa Local Residential Management Council ug Quick Response Team sa city hall aron pagpahibawo kun unsay angayan nga buhaton niini agi og pagpangandam sa posibling pag-igo sa bagyo dinhi sa syudad sa Sugbo. (BANAT NEWS)