CEBU, Philippines - Patay ang usa ka lalaki nga gidunggab sa iyang gikainom nga nakakita og lalis sa ilang higala sa miaging gabii sa sitio Lebaong sa Barangay Saavedra sa lungsod sa Moalboal.
Ang biktima naila nga si Jeffrey Aballe, 41, samtang ang suspetsado naila nga si Jonathan Hayag, 35, silingan ra sa biktima.
Base sa spot report sa kapolisan sa lungsod sa Moalboal nga nag-inom ang biktima ug ang suspetsado kuyog sa ilang mga higala dihang mitumaw ang panaglalis sa suspek ug sa higala nilang naila lang sa pangalang Nilo.
Matud pa nga niuwang ang biktima apan siya na hinuon ang nadunggaban sa suspetsado. Daling gidala ang biktima sa Badian District Hospital sa iyang mga kaliwat apan gideklarar na kini nga patay na dihang naabot sa tambalanan.
Daling misibat ang suspetsado human niya madunggaban ang biktima ug padayon pang gipangita sa kapolisan, usa ka kutsilyo ang nakuha diha sa crime scene nga gituohang maoy gigamit sa suspetsado sa pagdunggab sa biktima. (BANAT NEWS)