Duha sa 10 most wanted nadakpan sa CCPO

CEBU, Philippines - Nasikop sa kapolisan ang duha sa napulo ka tawo nga most wanted person sa dakbayan sa Sugbo sa managlahing operasyon sa kapolisan sulod sa duha ka adlaw.

Una nga nasikop sa kapolisan si Rojie dela Peña alyas Saba, 32, taga barangay Tungkop sa lungsod sa Minglanilla.

Matud pa sa Deputy City Director for Operation Supt. Reycel Dayon ang suspetsado nasikop  sa City Intelligence Branch ug sa  Pardo Police Station.

Narekober gikan sa suspetsado ang usa ka kalibre .45 nga pistola nga dunay unom ka bala ug usa ka kalibre .38 nga revolver nga may unom ka bala sa cylinder niini ug ang pipila ka ID ug ATM cards.

Matud pa ni Dayon nga ang suspetsado nalambigit sa pipila ka insidente sa tulis sa Bulacao, Pardo ug sa dakbayan sa Talisay. Gikataho nga ang suspetsado usa sab ka gun-for-hire sumala pa ni Dayon.

Dihang gipangutana sa mga tigbalita ang suspetsado hugot ning mihimakak may kalabotan sa mga tulis nga nahitabo sa Bulacao, Pardo ug sa Talisay.

“Wa ta anang linyaha uy, wa gyud ko manulis,” sumala ni Peña.

Samtang nasikop sab ang usa ka traffic aide sa dakbayan sa Toledo pinasikad sa warrant of arrest nga giisyu ni Judge Oligano Sarmiento sa RTC Branch 24 tungod sa kasong rape. Si Elmer Abella Sr., 50, kasamtangang nagpuyo sa Pulang Bato sa dakbayan sa Toledo gipasanginlan nga milugos sa iyang anak niadtong 1998.

Matud pa nga sukad niadto wala na makit-i ang suspetsado kun asa na kini ug bag-o lang nasayran sa kapolisan nga ang suspetsado nagtrabaho isip traffic aide sa dakbayan sa Toledo.

Nagdumili kini pagluwat og pamahayag dihang gipangayoan sa mga tigbalita og komento, apan miklaro siyang wa siya magtago maong nagtrabaho siya karon.  (BANAT NEWS)