Tindero’g ukay-ukay naghikog patay

CEBU, Philippines - Patay na nga nadiskubrehan ang usa ka  tindero og ukay-ukay nga  gituohang naghikog pinaagi sa paghigot og pisi nga nylon sa iyang liog kagahapon sa buntag sulod sa   iyang lawak sa sitio Centro, barangay Jugan, lungsod sa Consolacion.           

Ang namatay mao si Wilfredo Luardo, 46, biyudo  nga nagpuyo sa maong dapit .

Ang  iyang  anak  nga  si  Junwel Luardo, 25, nga  nagpuyo usab sa maong dapit  maoy  nakadiskubre  sa  nagbitay  patay  niyang  amahan.

Si PO1 Retchie Geleran ug PO1 Michael Villardar sa Consolacion Police Station nga maoy nakatubag sa maong alarma nga nahinabi sa Banat News miingon  nga nasuta  gyud  nila  nga  patay  na  ang  naghikog  sa ilang  pag-abot  sa balay niini

Si PO1  Villardar  nga nahinabi sa Banat News miingon nga  wala  gayuy  kasayuran  ang mga sakop sa pamilya sa namatay   sa hinungdan  sa paghikog  niini.

Nasuta usab  nga walay  sakit  ug  walay dakong  problema  ang  ilang  amahan.

Ang anak sa namatay   nagkanayon  nga alas 10:00  na  sa gabii  nauli  ang  ilang  amahan  gikang  naninda  og  ukay-ukay. Dihang  pukawon  unta  kini   kagahapon  sa  buntag  kay mamahaw,  nakurat  na lang  siya  kay  patay  na  kini  samtang  nagbitay  sa ilang sagbayan. (BANAT NEWS)