Taiwanese nag-snorkling namatay

CEBU, Philippines - Wala na malibre  ang usa ka ginang nga Taiwanese nga namatay  samtang  nag-snorkling  didto sa kadagatan  sa Brgy. San Vicente, isla sa Olango sa milabay’ng hapon.      

Ang biktima mao si Tu Hsiu Chin, 60, minyo, usa ka Taiwanese national nga kasamtangang nagpuyo sa Crown Regency hotel sa dakbayan sa Sugbo.       

Sa pasiunang imbestigasyon ni PO3 Lydo Pinos sa Lapu-Lapu City Police Office nasuta nga  sa alas  3:00 sa milabay’ng hapon   nag- snorkling sa fish sanctuary sa maong dapit si Tu  dihang  wala  na  kini  maglihok.

Nahibulong ang iyang mga kauban  hinungdan nga ila kining gi-rescue.      

Gisuwayan sa pagluwas sa mga  rescuer   apan  bisan  giunsa  nila wala  na  gyud   kini mulihok hinungdan nga  ila  kining  gidala sa tambalanan.

Apan gideklarar  kini  nga dead on arrival sa mga mananambal.       Nagduda ang kapolisan nga giatake sa kasingkasing si Tu  samtang  kini  nag-snorkling sa dagat. Apan aron sa pagsiguro sa hinungdan sa kamatayon niini, gipaubos sa autopsy ang patay’ng lawas sa biktima sa usa ka funeral parlor sa dakbayan sa Mandaue. (Bong Soriano/WC)

P561 mil gahin alang sa mga  nasunogan sa Umapad

Mokabat sa P561,000 ang girekomendar nga gahin didto  sa Purok, Limonsito sa barangay Umapad, dakbayan sa Mandaue   kinsa  nabiktima sa sunog niadtong Disyembre 13 sa miaging tuig.

Nasuta  nga 36 ka balay  ang hingpit nga naugdaw ug lima ka  balay   ang  igo  lang  nakan-an  sa kayo.       Ang maong gahin giduso ni Violeta Cavada, ang  City Social Welfare officer sa maong dakbayan ngadto sa City Disaster Risk Reduction and Management Council (CDRRMC).

Diha-diha    mirekomendar  dayon  ang  CDRRMC  sa paggahin sa maong kantidad isip pinansiyal nga hinabang sa mga biktima gikan sa kagamhanan sa maong dakbayan.      

Ang  CDRRMC  miduso sa  maong  sugyot  nga  gahin  ngadto   sa konseho   aron  kini  hingpit  nga  kagahinan  og  salapi.  Gibahig ang maong gahin ngadto sa nagkalainlaing kantidad sa matag biktima   kansang  mga  balay  pulos  gihabhab  sa kayo.      

Nalakip na niini ang 36 ka pamilya nga  gigahinan  og P360,000 kinsa matag  usa  nakadawat  og  tag P10 mil.        Samtang  tag P5 mil  usab  ang  matag  usa  ka  pamilya  kansang balay  igo  lang  nakan-an  sa kayo.  Susama  usab  niini  ang  nadawat  sa  mga  mangangabang  sa  mga balay  nga  naugdaw.      

Si Umapad Barangay Kapitan Nelson Rubio nga nahinabi sa Banat News kagahapon miingon nga ang mga dapit nga nasunogan nga ilang gipaubos  sa  state of calamity,  gigahinan usab og salapi gikan sa  panudlanan  sa barangay   nga  tag P2,000  matag usa. (BANAT NEWS)