Gipapriso tungod sa P10

CEBU, Philippines - Gipapriso sa usa ka polis ang usa ka lab-asero og isda sa Pasil Fish Market sa barangay Pasil ning syudad sa Sugbo tungod lamang sa P10 nga kulang sa sukli.

Sigon sa record sa San Nicolas Police Station pinaagi ni PO2 Eric Arnido, ang gipapriso mao ang usa ka Nolasco Baclohan, 45, taga barangay Suba ning syudad sa Sugbo ug karaan nang namaligya og isda sa Pasil.

Ang polis nga nidakop ug nipapriso kaniya tungod sa kasong swindling mao si SPO2 Romeo Gingoyon nga nadestino sa Public Safety Battalion sa Cebu City Police Office sa Camp Sotero Cabahug.

Sigon sa reklamo sa police nga iyang gipalitan og usa ka kilo nga isda si Baclohan sa tag-180 pesos ang kilo apan gisuklian lamang ang iyang 200 pesos og P10 nga sensilyo.

Dihang gisultihan sa polis si Baclohan nga kulang og P10  ang iyang sukli miinsister si Baclohan nga 190 pesos ang iyang gisulti nga presyo kada kilo sa iyang isda hinungdan nga nisangpot kini sa panaglalis. Tungod sa pagpangisog sa naasoy nga fish vendor gidakop kini ni Baclohan tungod kay giilad ug gilimbungan siya niini.

Hinuon gibuhian ra kini pagkahapon human mapupos ang reglamentary period nga wa mopasaka og kaso si Gingoyon.  (BANAT NEWS)