1 patay, 1 angol sa dasmag

CEBU, Philippines - Patay ang usa ka lalaki nga nadasmagan  sa Ceres bus didto sa sitio Lamak, barangay Ilihan sa lungsod sa Tabogon  pasado  alas 4:00  sa miaging  kaadlawon.

Ang biktima naila nga si Felomino Gorgonia Ytang, 61,  molupyo sa nahisgutan nga lugar.

Samtang ang drayber sa bus naila nga si Christopher Chavez, 37, taga Aguho sa lungsod sa Daanbantayan.

Base sa imbistigasyon sa kapolisan nga ang biktima naglakaw sa dalan samtang ang Ceres bus nga may plate number GXR 783 padulong sa dakbayan sa Bogo.

Matud pa nga samtang naglakaw ang biktima nadumbolan kini sa Ceres hinungdan nga nalabay kini pipila ka metros nga maoy hinungdan sa hinanali   niyang kamatayon

Kasamtangang  anaa  sa kamot  sa kapolisan  sa Tabogon  ang  driver.

Samtang angol ang usa ka lalaki nga nagmaneho sa motor human kini madasmagi sa Mazda Dropside nga sakyanan sa sitio Filomina, barangay Binabag sa dakbayan sa Bogo pasado alas 10 sa miaging gabii.

Ang biktima  mao  si Gregorio Inting, 51, taga sitio Biasong, barangay Maño sa lungsod sa San Remegio.

Samtang ang drayber sa Mazda dropside naila nga si Guillven Jumaquio, 20, molupyo sa Francisca Village, barangay Banawa sa dakbayan sa Sugbo.

Base sa imbistigasyon sa kapolisan nga nagsugat sa dalan ang duha ka sakyanan.

Matud pa nga ang motor gikan sa San Remegio padulong sa dakbayan sa Sugbo samtang ang Mazda gikan sa dakbayan sa Sugbo padulong sa Daanbantayan.

Dihang naabot na sila sa maong lugar ang Mazda midumog sa motor sa lane sa motor.

Naangol ang drayber sa motor nga daling gidala sa Bogo District Hospital ug ang drayber sa Mazda kasamtangang natanggong sa Bogo City Police Station. (/WC)(BANAT NEWS)