Wa mobayad sa utang giluba angol

CEBU, Philippines - Hapit  lapsi  sa  kutsilyo  ang  kamot  sa usa ka  trabahante  nga gidunggab  sa iyang  kauban  kay  wa  siya kabayad  sa iyang  utang  nga  P300 didto sa sitio Istasyon,  barangay  Mabolo, dakbayan  sa Sugbo  kagahapon  sa alas  2:30 sa kaadlawon.

Ang  biktima  mao  si  Marlon Ocampo, hingkod, kasamtangan nga nag-istar sa Carpenter Makati Development Corporation ug lumad nga taga Valencia, Negros Orriental, samtang  ang  suspek  nailhan usab  nga  si Ricky Rabor Y.  Laborte, 33, minyo,  nga  taga sitio  Malang Suba,  barangay  Bagakay, dakbayan sa Dumaguete.

Ang  biktima misaysay  sa kapolisan  nga  hapit  lapsi  sa kutsilyo  ang  iyang  kamot  dihang  gihansak  kini  sa suspek kaniya.

Midugang  ang  biktima  nga  napungot  ang  suspek  kay  gibalibaran  niya kay wala  siya’y  kuwarta  dihang  naningil  kini  sa iyang  utang   nga  P300.

Matud pa ni Ocampo nga   bag-o  pa  siyang  naabot sa  ilang giistaran  dihang  gipaningil  siya sa suspek.

Sa  dihang  iyang  gibalibaran  kalit siyang  gihansakan  sa kutsilyo  niini.

Maayo  na lang  kay may  pangamot  siyang  dyutay,  nasagang  niya  ang  kutsilyo  apan  midulot  kini  busa  mibuhagay  ang  daghang  dugo  gikan  sa samad  sa iyang  kamot.

Si Laborte gidakop sa miresponde nga kapolisan  ug kasamtangan nga nabilanggo sa Mabolo Police Station 9.(/WC). (BANAT NEWS)