Bagyong Agaton moagi sa Cebu
CEBU, Philippines - Gipahibalo sa Pag-asa Mactan nga uwanon ang umaabot nga Sinulog karong Domingo nunot sa pagsulod sa bagyong Agaton sumala pa sa Philippine Atmospheric Geophysical and Astronomical Service Administration (Pag-asa).
Si Vangie Tolentino sa Pag-asa Mactan nga nahinabi sa Banat News, nagkanayon na maagian sa maong bagyo ang habagatang bahin sa Sugbo apan wala pa sila nagdeklara og storm signal.
Makasinati usab ang dakbayan og mapanganurong kalangitan nga may kasarangan ngadto sa panagsang pagbunok sa uwan. Dugang pa ni Tolentino nga posibling maapektuhan ang mga kalihokan sama sa Sinulog grand parade ug ang street dancing nga ipahigayon sa kadalanan ugmang adlawa.
Mao kini ang unang tropical depression nga misulod sa Philippine Area of Responsibility niadtong 14 sa Enero, 2014 pasado alas 12:00 sa udto ug gibana-bana nga 150 kilometros amihanang sidlakan sa Hinatuan Surigao del Sur.
Ang bagyong Agaton aduna’y gikusgon sa hangin nga 55 kph. Gipaubos usab sa signal number one ang mga lugar nga Dinagat, Surigao del Sur, Surigao del Norte, Siargao, Agusan del Sur, Agusan del Norte, Davao Oriental ug Compostela Valley. Matud pa nga uwanon ang Eastern ug Central Visayas ug delikado usab ang kadagatan sa Luzon, Visayas ug Caraga regions. Samtang gipaabot sa Philippine Coast Guard-Cebu nga gatosan ang moapil sa fluvial procession karong adlawa sa kadagatan sa Lapu-Lapu, Mandaue ug Sugbo agi sa Mactan Channel.
Ang Coast Guard nakarehistro na og 85 ka mga sakyanang pangdagat nga kompirmadong mosalmot sa fluvial procession.
Apan gipaabot nga mas modaghan pa kini kun moapil na ang gagmay nga mga sakyanang pandagat sama sa mga pumpboat ug baroto nga wala magparehistro. Ang Cebu District Commander sa Coast Guard, Cdr. Rodulfo Villajuan, miingon nga duna na sila’y lugar nga gigahin kun asa mahimutang ang mga dagkong barko ug ang mga gagmay.
“Hindi maiiwasan na may mga sasali kaya hindi na naming ma-hold ‘yan but we have to make sure na andu’n sila sa hulihan,†matud ni Villajuan.
“Ninety eight percent ready na kami ngayon kasi hirap namang sabihing 100 percent hindi naman kami perpekto,†sumala pa ni Villajuan.
Hinuon daan nang mipasidaan ang PCG nga mahimo nilang kanselahon ang fluvial procession kung mograbe ang lakaw sa panahon nga peligro na sa mga sakyanan sa dagat nga mangapil. (Bryner Diaz ug Marjorie Caballero USJR Intern /EIM) (BANAT NEWS)
- Latest
