Sinulog sa kabataan-dakbayan

CEBU, Philippines - Titulo nabawi sa ANS, Banilad mikampeyon sab

Wa mahinayon ang street dancing sa Sinulog sa Kabataan-Dakbayan kagahapon sa hapon tungod sa way puas nga pag-ulan, apan gitiwas kini diha na mismo sa Cebu City Sports Center.

Nasakmit sa Banilad Elementary School ug Abellana National School ang 1st Place sa Sinulog sa Kabataan Dakbayan.

Ang mga miapil sa Sinulog sa Kabataan Elementary Division mao ang Inayawan Elementary School, Cebu City Don Carlos A. Gothong Elementary School, Banilad Elementary School, Quiot Elementary School, Alaska Elementary School, Talamban Elementary School ug ang Tisa II Elementary School.

Samtang sa Secondary Division mao ang Ramon Duterte Night High School, Abellana National School, Don Sergio Osmeña Sr. National High School, Tejero Night High School ug ang Apas National High School.

Sa Elementary Division, nakuha sa Quiot Elementary School ang 5th place, sa 4th place mao ang Tisa II Elementary School, 3rd place ang Alaska Elementary School, 2nd place ang Talamban Elementary School ug 1st place ang Banilad Elementary School.

Sa Secondary Division, 5th place mao ang Ramon Duterte Night High School, ang 4th place mao ang Tejero Night High School, 3rd place ang Don Sergio Osmena Sr. National High School, 2nd place mao ang 2012 ug defending champion nga Apas National High School ug sa 1st place ang Abellana National School.

Ang premyo sa 1st place P300,000, P150,000 sa 2nd place, P100,000 sa 3rd place, P75,000 sa 4th place, P50,000 sa 5th place ug 5,000 gift certificates sa wala makadaog.

Si John-John Belsis, choreographer sa Banilad Elementary School nahinabi sa Banat News, miingon nga dili masukod ang kalipay nga iyang gibati. “Happy kaayo ko for the first time alang gyud kini kang Señor Santo Niño.”

Septiyembre pa sila nangandam sa maong kompetisyon inabagan sa pundo sa eskuylahan ug mga ginikanan sa mga nangapil.

Samtang ang choreographer nga si Walter Pepito, sa Abellana National School mibutyag sa Banat News nga dako kaayo ang ilang pasalamat nga nabalik kanila ang titulo. Tulo ka tuig nga kampeyon ang ANS. (BANAT NEWS)