Drug pusher patay sa polis

CEBU, Philippines - Patay ang usa ka notadong drug pusher human kini misulay og pusil sa kapolisan atol sa usa ka operasyon nga gihimo sa Provincial Intelligence Branch sa Cebu Provincial Police Office sa buwangan sa sitio Pandan, barangay Mahawak sa lungsod sa Medellin pasado alas 4:00 sa miaging hapon.

Ang namatay naila nga si Alan Arriesgado, molupyo sa barangay Mohon sa lungsod sa Medellin ug ang angol naila nga si Vicente Rosos.

Samtang nasikop si Jerry Arriesgado igsuon ni Allan ug si Marrisa Arriesgado nga inahan sa namatay.

Matud pa ni SPO1 Reynaldo Solante ang team leader sa maong operasyon nga duha ka adlaw na nilang gi-atngan si Allan ug nangita sila og higayon nga madakpan kini.

Sumala pa ni Solante nga miresponde sila sa alarma nga dunay mga armadong tawo sa buwangan tungod kay fiesta sa maong lugar ug nasuta nga ang maong armadong tawo mao si Allan.

Matud pa nga nakabantay si Jerry sa presensya sa polis sa maong lugar ug mipahibalo kini dayon kang Allan. Sumala pa nga mibunot dayon sa iyang .9mm nga pistola si Allan apan naunhan siya sa mga operatiba nga mipusil kaniya sa iyang ulo. 

Mobalos unta si Jerry pagkakita niya nga natumba sa yuta ang iyang igsoon apan wala kini kahimo tungod sa kadaghang polis nga naa sa lugar.

Si Rosos nga armado usab misulay unta og pusil sa mga polis apan naunhan siya ug napusilan sa iyang tiil.

"Manukol ra ba gyud unta kay agresibo kaayo pero wala na katira kay daghan man pud tong tawo labi na mga bata posible daghang maigo," matud pa ni Solante.

Samtang nasikop sab si Marrisa ang inahan ni Allan apan naka-ipsot ang iyang usa ka anak niini nga si Salve nga armado usab og kalibre .45 nga pistola nga iyang nabiyaan sa pagdinali-dali niini.

Narekober sa kapolisan ang pipila ka pakete nga shabu nga mokabat og P100 mil, .9mm nga pistola nga may 16 ka bala, .357 magnum revolver nga may unom ka bala, .45 nga pistola nga may 14 ka bala, .22 Black Widow nga revolver nga may bala, hand grenade, resibo sa money transfer ug usa ka notebook nga may P700 mil nga kolektahonon.

Matud ni Solante nga si Allan usa ka notadong drug pusher sa habagatang Sugbo ug kini naa sa listahan sa PIB nga usa ka level 3 drug pusher.

Ang drugas nga narekober gidala na karon sa PNP Crime Lab-7 sa Camp Sotero Cabahug sa dakbayan sa Sugbo.

Wala hinuon maestablisar sa kapolisan kun unsay kalambigitan sa inahan sa napatay nga si Allan.

Apan si Marrisa ug ang anak niini parehong gitanggong sa Consolacion Police Station samtang giandam pa ang kasong kalapasan sa Section 11 sa RA 9165 o Dangerous Drugs Act of 2002 ug kalapasan sa  RA 10591 o Comprehensive law on Firearms and Ammunition.

Ang managsuon nga si Allan, Salve ug Jerry ang gitudlong suspek sa pagpusil patay ni Ricky Lauron, 38, ug pagkaangol ni Harry Neri, 40,  sa usa ka buwangan sa Barangay Tinubdan, Daanbantayan human sa ilang mainitong panaglalis. (BANAT NEWS)