CEBU, Philippines - Gitinguha ni Cebu 6th District Board Member Thadeo Ouano nga kahatagan og pasidungog sa kagamhanan sa lalawigan sa Sugbo si Kiyomi S. Watanabe nga taga barangay Labogon sa dakbayan sa Mandaue tungod sa naangkon niyang kadaugan sa 27th South East Asian Games didto sa Burma (Myanmar).
Matud pa ni Ouano nga gusto niyang kahatagan ang maong atleta og P25,000 nga cash incentive gikan sa iyang pundo sa lehislatiba. Sa iyang resolusyon ni Board Member Ouano mipasabot nga si Kiyomi Sarausad Watanabe, 16, nga anak sa usa ka Japanese national, apan maisip kining usa ka lumad nga Sugboanon tungod kay ang iyang inahan nga si Irene lumad man nga taga barangay Labogon sa dakbayan sa Mandaue.
Giasoy ni Ouano nga si Kiyomi didto ipakatawo sa Cebu Doctor’s Hospital sa dakbayan sa Sugbo 16 ka tuig ang nakalabay.
Dugang pa ni Board Member Ouano nga si Kiyomi sukad sa iyang pagkahimugso didto kini magpuyo sa sitio Sta. Cruz sa barangay Labogon sa dakbayan sa Mandaue .
Didto usab kini magtungha sa elementarya sa Barangay Labogon Elementary School. Ang inahan niini kaniadto nahimo usab nga presidente sa Parents Teacher Association (PTA) ug nagsilbi usab nga -Vice President sa Kapilya sa Sr. San Pedro sa maong dapit sa 8 anyos pa ang iyang panuigon.
Apan sukad sa maong higayon gidala sa iyang ginikanan si Kiyomi ngadto sa Japan ug dihang mi-edad na siya og 16 nahimo siyang usa sa mga nag-unang atleta sa Japanese Judo team .
Apan sa gihapon nagpakita kini sa iyang pagkatinuod nga Filipino sanglit sa ika-26th Southeast Asian Games didto sa Jakarta, Indonesia nalangkat niya ang bronze medal ug sa 27th SEA Games sa Burma nakuha niya ang gold medal.
Gitataw ni Ouano sa iyang resolusyon nga bisan sa kalinghod sa iyang pangisip apan nakahatag kini og garbo sa mga Sugboanon ilabi na sa iyang pagsalmot sa Philippine Team sa Women’s Judo sa 2011 ug hangtod na karon sa 2013 SEA Games nga ubos usab sa paggiya ni Atty. Vicente Fernandez II nga maoy bise presidente sa Philippine Judo Federation.
Dugang pa ni Ouano nga bisan kun nagbase na kini sa Japan, si Kiyomi Watanabe sa gihapon wala kini makalimot sa yuta niyang natawhan kay gani misalmot man kini sa Philippine Team diin usab nakatampo kini sa paglangkat og mga kadaugan. (BANAT NEWS)