CEBU, Philippines - Bisan og gitataw na sa City Engineers Office nga mahimo pa nga gamiton ang Pasil Fish Market phase-1 atubangan sa San Nicolas Church apan hugot ang baruganan ni Mayor Michael Rama nga gub-on na lang kining mao nga building aron himoon nga public plaza ang mao nga dapit.
Si Engr. Ariel Dela Cruz, consultant ni Mayor Michael Rama alang sa engineering matters, mitataw nga mahimo pa nga gamiton ang market building kay lig-on pa ang mga haligi niini bisan og gitay-og kini sa linog kaniadtong Oktubre 15.
Lima ka tawo ang namatay dihang nahugno ang usa ka sementado nga bahin sa Fish Market Building atul sa linog mao nga wala na ipagamit pa ni Mayor Rama ang merkado.
Gisugyot ni Dela Cruz nga ang sementado nga sandayong isip pangsawod sa uwan didto sa balisbisan sa atop sa market building mao ra’y kinahanglan nga tangtangon aron mogaan ang pas-anon sa mga haligi.
Matud ni Dela Cruz nga dihang gisusi niya ang fish market building wala siya makakita og mga liki sa haligi nga nagpasabot nga lig-on pa ang mao nga estraktura.
Apan si Acting City Engineer Jose Marie Poblete miingon nga adunay proyekto si Mayor Rama nga himoong public plaza ang nahimutangan karon sa Pasil Fish market phase-1.
Ang tumong niini nga monindot ang mao nga dapit ug gamiton na sa kaparian sa San Nicolas ang ilang main entrance sa simbahan nga sukad pa kaniadto gitak-opan tungod sa kabaho.
Ang mga wholesaler og mga isda tua gipapaninda sa dakung hawan duol sa Pasil Fish Port daplin sa dagat samtang ang mga retailers ug mga isda adto papanindahon sa Pasil Fish Market Phase 2. (BANAT NEWS)