Mga driver sa traysikad nga moagi sa SCR dakpon

CEBU, Philippines - Sikopon na sa kapolisan sa siyudad sa Talisay ang mga drayber  sa  traysikad  nga moagi sa South Coastal Road (SCR). Kini human mosanong ang mga opisyal sa tulo ka mga barangay  sa SCR sa hangyo sa mayor sa siyudad sa Talisay nga did-an ang mga traysikad  sa pag-agi  sa  maong dalan  aron malikayan ang disgrasya.

Suma pa ni City Legal Officer Atty. Alfredo Sipalay nga daghan na ang mga reklamo nga nadawat sa buhatan sa mayor labot  sa paglabang sa mga traysikad sa SCR hinungdan nga daghan usab ang nadisgrasya tungod sa kakusog  managan sa mga sakyanan sa maong  highway.

Si Atty. Sipalay nalipay kaayo sa pagsanong sa mga barangay kapitan sa  San Roque, Cansojong ug San Isidro.

Kini tungod kay masiguro na sa iyang buhatan nga wala nay  madisgrasya   nga taga Talisay nga mosakay og traysikad.        Iyang giklaro nga base unya sa maong lakang ang mga  drayber   sa traysikad anha  ra  kutob  sa matag eskina  sa SCR  sa maong mga barangay.

Dugang pa niini, si Sipalay  nagkanayon nga gihimo nila ang maong lakang aron dili modaghan ang mobasol sa mayor sa siyudad  nga walay nahimo sa maong suliran.(/WC)(BANAT NEWS)