Giluba angol sa pag-umangkon
CEBU, Philippines - Usa ka lalaki ang gidunggab sa iyang pag-umangkon sa New Imus Road, barangay Lorega-San Miguel dakbayan sa Sugbo pasado alas 6:00 sa miaging gabii.
Ang biktima nailhan nga si Larry Sanchez, 48, aduna’y ka live-in partner, electrical assistant sa Universal Micromatic System Services Inc., molupyo sa sitio San Roque, sa maong dapit.
Samtang ang suspetsado naila nga si John Ernest Zabate, 28, aduna’y ka live-in partner, molupyo usab sa maong lugar.
Basi sa imbestigasyon sa kapolisan nga gihimo nila ni SPO1 Ruth Bongo-Violango, PO3 Geoffrey Gutual, PO1 Michael Angelo Singson ug PO1 Joel Zamora sa Homicide Section sa Cebu City Police Office, ang biktima naglakaw sa dalan paingon sa Water Refilling Station sa naasoy’ng lugar uban ang iyang anak nga si Larryboy. Unya gisundan sila sa suspetsado nga nagdala sa kutsilyo ug gidunggab dayon ang biktima.
Nakaangkon kini og samad-dinunggaban sa wa’ng kamot, dughan ug sa too’ng kamot.
Daling midagan ang suspetsado palayo ug nakahigayon usab ang biktima pagsakay sa taxi paingon sa Cebu City Medical Center aron matambalan.
Si PO1 Michael Angelo Singson sa Homicide Section sa Cebu City Police Office nga nahinabi sa Banat News miingon nga nagkalalis pa ang biktima ug ang suspetsado nianang sayo pa sa maong adlaw.
Sigun pa ni Singson nga aduna na’y panagbikil ang suspetsado ug ang biktima kaniadto.Natanggong na karon ang suspetsado sa Cebu City Police Station. (/WC)(BANAT NEWS)
- Latest
