CEBU, Philippines - Himuong scholar sa lokal nga kagamhanan sa lungsod sa Medellin ang manghud sa gipatay nga kawani sa bangko sa lungsod sa Daanbantayan.
Gipahibawo ni Medellin Mayor Ricardo Ramirez nga mahuman ni Jevin John Migabon ang iyang kurso sa edukasyon nga libre sa Cebu Normal University (CNU) – Medellin campus.
Si Migabon, 21, igsoon ni Jennelyn Migabon, 26, kinsa napalgan nalang patay kauban sa laing duha ka biktima sud sa Fair Bank sa lungsod sa Daanbantayan buntag sa Bag-ong Tuig.
Si Jennelyn giingong maoy naggasto sa pagtungha ni Jevin John sa CNU campus sa ilang lungsod.
“Agi’g tabang gikan kanamo nga opisyales sa lungsod, among gipahibalo ang CNU Medellin nga wala nay bayranan sa matrikula ang iyang manghud kutob sa pag-gradwar agi’g tabang gikan kanamo para sa pamilyang nagbangutan,†matud pang Ramirez.
Ang pamilya ni Jennelyn anaa nagpuyo sa Barangay Dayhagon, Medellin.
Siya nagtrabaho isip accounting clerk sa First Agro-Industrial Rural Bank Inc., o Fair Bank sa lungsod sa Daanbantayan.
Kasong pagpanulis ug pagpatay ang atubangon sa suspetsado nga si Berly Tudtud, 28, nga gitumbok nga nipatay sa mga biktima ug gitulis ang P80 mil nga kwarta sa bangko nga kanhi niya gitrabahoan.
Si Tudtud giingong nigamit sa iyang 12 gauge shotgun sa pagpusil patay sa kaubang gwardiya nga si Dean Deserto, 26, ug puyo-puyo niini nga si Cecilia Torre, 30, nga pulos taga Barangay Dakit, Barili ingon man kang Jennelyn. (BANAT NEWS)