Mga kawani sa Carcar gipa-drug test
CEBU, Philippines - Gipaubos sa mayor sa syudad sa Carcar ang kapin sa 300 ka mga empleyado sa city hall sa suprise drug testing niadtong Biyernes.
Kini aron pagtino sa nadawat niyang report nga may mga kawani sa city hall sa Carcar ang naggamitan og ginadiling drugas.
Si Carcar City Mayor Nicepuro Apura nitug-an sa mga tigbalita nga gikalitan niya og sirado ang tanang mga pultahan ug agianan sa city hall aron pagsiguro nga wala’y bisan usa sa 300 ka mga job order ug 79 ka mga casual employees ang makalusot sa naasoy nga drug test.
Ang mayor nibahad gyud nga dili siya magmakuli sa pagtangtang sa mga kawani sa kagamhanan sa syudad sa Carcar nga mamatud-an nga naggamitan og illegal nga drugas.
Gipahibawo usab sa mayor nga ang gipatuman niya nga surprise drug test kabahin sa iyang pagsusi sa lawas ug dugo sa tanang kawani kun wala bay sagul nga gidiling drugas.
Mahimo usab kining kabasehan sa pag-renew sa mga kontrata sa mga job order ug casual employees sa city hall, matud niya. (BANAT NEWS)
- Latest
