Babaye gilabniha’g bag

CEBU, Philippines - Nawad-an sa iyang salapi ug cellphone  ang usa ka babaye dihang  gilabni ang iyang shoulder bag  sa  lalaki  nga  nagsakay  og motorsiklo  alas 7:00 pasado ang takna kagahapon sa buntag, sa dalan Burgos sa barangay Alang-Alang dakbayan sa Mandaue.     Ang biktima mao si Cocamaris Flores, 29, dalaga nga  taga barangay Cambaro sa maong dakbayan .    

Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) nga nagbase sa barangay Centro nga nahinabi sa Banat News miingon nga gikan pa nga  misimba sa national Shrine of Saint Joseph sa barangay Centro ang  biktima.     Dugang pa niya nga naglakaw kini pauli sa ilang  balay sa barangay Cambaro dihang ang snatcher  kalit  lang  mipabagiyus  sa iyang motor  ug  gibunlot ang gisambilay   niyang shoulder bag.  Matud pa ni PO2 Lutchavez nga gawas sa cellphone nga balor og P15 mil,  ang  salapi sa biktima nga wala na matino ang kantidad  nahilakip  usab  sa pagsakiyo.    

Si PO2 Lutchavez miingon nga padayon pa nila karong gipangita  ang  snatcher. (BANAT NEWS)