Tulo sikop tungod sa illegal swertres

CEBU, Philippines - Tulo ka lalaki ang nasikop sa kapolisan sa dakbayan sa Sugbo sa illegal numbers game “swertres” human sa ronda nga gipahigayon niini sa managlahing lugar sa dakbayan sa miaging adlaw.

Nasikop si Reynaldo Canayon Tañag Jr., 32, sa kapolisan sa Waterfront Police Station human kini naaktohan nga nag-tally sa mga numero sa swertres sa  Sitio Silangan II, Arellano Boulevard sa barangay Tejero pasado alas 9:00 sa buntag sa miaging adlaw. Narekober gikan sa suspetsado ang  usa ka bundle sa stub nga may suwat nga kombinasyon sa swertres, usa ka ballpen ug P90 nga halin niini. Nasikop usab si Fermin Cana, 24, nga nasakpan sa akto sa kapolisan sa Pardo Police Station nga nag-isyu ngadto sa wala mailhing tawo og numero sa swertres.

Nakuha gikan sa suspetsado ang  usa ka stub nga may kombinasyon sa swertres, usa ka ballpen, ug P45 nga halin sa maong suspetsado.

Samtang nasikop usab sa saturation drive sa Taboan Police si Christian Llanto alyas Jojo, 28, nga usa sab sa mga target personalities sa maong lugar tungod sa kalambigitan niini sa illegal nga sugal.

Nakuha gikan kaniya ang usa ka ballpen, stub nga kombinasyon sa swertres, ug P85 nga halin niini.

Mag-atubang og kasong kalapasan sa RA 9827 o Illegal Gambling ang tulo ka suspetsado nga ipasaka kanila karong adlawa. (BANAT NEWS)