CEBU, Philippines - Nasikop sa kapolisan sa dakbayan sa Bogo ang usa ka cargo truck nga luwan ang 120 ka sakong kinhason nga gikan sa Masbate human kulang ang gipakitang papeles sa drayber niini pasado alas 7:00 sa miaging gabii.
Ang drayber sa maong trak naila nga si Dioly Rivera Languido, 38, molupyo sa Poblacion, Masbate.
Ang maong trak nga may markang NARD-J may plate number TPT 961 narehistro sa pangalan ni Victor Reyes sa Bapor, Poblacion, Masbate.
Ang tag-iya sa mga karga nga kinhason naila nga si Reynaldo Silva Cabico, 65, molupyo sa Divisoria, Kawayan, Masbate.
Matud pa nga gipara ang maong trak sa kapolisan sa dakbayan sa Bogo sa gipahigayon nga checkpoint atubangan mismo sa Bogo City Police Station apan pakyas ang drayber sa pagpakita og permit niini. Narekober sa kapolisan ang 45 ka sakong Bungkawil, 40 ka sakong Tikab, 25 ka sakong Binga, ug napulo ka sakong fusic.
Matud pa ni Supt. Anthony Bagarinao ang hepe sa Bogo City Police Station nga nahinabi sa Banat News nga kulang ang papeles sa maong cargo truck hinungdan nga gi-hold lang usa nila ang karga niining kinhason.
Sumala pa ni Supt. Bagarinao nga wala makakuha og clearance sa Bureau of Fisheries and Aquatic Resources hinungdan nga gi-hold lang usa nila kini.
Midugang si Supt. Bagarinao nga nakig-alayon sila sa BFAR aron ilang masusi ang kinhason nga nasikop sa kapolisan.
Nasuta sa taga-BFAR sumala pa ni Supt. Bagarinao nga dili endangered species ang maong mga kinhason ug gipa-comply lang ang tag-iya niini sa requirements sa BFAR.
Gihatagan ra usab og go signal sa BFAR ang maong cargo truck human ma-comply niini ang requirements. (BANAT NEWS)