CEBU, Philippines - Nasikop sa kapolisan ang usa ka lalaki nga gitudlo nga midagit sa usa ka babaye lakip na ang usa ka menor nga mireklamong gilugos niini sulod sa upat ka adlaw pasado alas 5:00 sa hapon sa miaging adlaw.
Ang nasikop naila nga si Dems Bonsukan Sadaya alyas James, 27, pump attendant sa usa ka gasoline station, molupyo sa Tipolo sa dakbayan sa Mandaue nga kasamtangan nga nagpuyo sa West Binabag, barangay Tayud sa lungsod sa Consolacion.
Samtang ang kauban ni Sadaya padayon pang gipangita sa kapolisan nga gihulagway nga taason, tambok, puti ang pamanit, ug may patik ang duha ka kamot.
Ang biktima nga mireklamo ni Sadaya mao ang 17-anyos nga dalagita nga nagpakitabang sa mga concerned citizen human siya makahigayon og ikyas sa balay nga gidad-an kaniya.
Matud pa nga nadakpan ang suspetsado human kini mipakita sa barangay hall sa Tayud Consolacion niadtong Lunes sa gabii.
Matud pa sa biktima nga gidagit siya ug ang iyang amiga nga 18-anyos, molupyo sa sitio Sun-ok sa dakbayan sa Lapu-Lapu sa mga suspetsado niadtong Disyembre 30 sa gabii.
Matud pa nga gipugos sila sa pagpasulod sa mga suspetsado sa puwa nga van ug gibaharan sila ni Sadaya nga patyon samtang luwan sila sa maong van ug misugod kini og halok sa biktima.
Matud pa nga gidala sa mga suspetsado ang mga biktima sa usa ka balay sa Tayud apan usa ka oras gibulag sila sa mga suspetsado.
Ang 17-anyos nga biktima nahibilin sa maong balay kuyog ni Sadaya samtang gidala sa wala mailhing lalaki ang iyang amiga.
“Gibuwag kuno sila unya ang gadala sa 18 anyos katong taason nga pution ug dunay patik sa bukton,†matud ni PO3 Arthur Ariate nga nahinabi The Freeman/Banat News.
Matud pa nga gimolestiya sa suspetsado nga si Sadaya ang menor sa pipila ka higayon sukad niadtong petsa 30 sa Disyembre ug hangtod sa petsa 3 sa Enero.
Dihang gisukit-sukit sa mga tanod sa barangay Tayud ang maong biktima mibutho ang suspetsado nga positibong gitudlo niini nga maoy mi-kidnap ug milugos kaniya sa pipila ka higayon. Hinungdan nga dali kining gisikop sa mga tanod ug karon nagtingkagol na sa karsel sa kapolisan sa lungsod sa Consolacion.
Ang kapolisan padayon pa sa pagpangita sa kaubang suspetsado ni Sadaya ug ang giingong kauban sa biktima kung asa na kini napunta.
Kasong Rape with Serious Illegal Detention ang atubangong kaso sa mga suspetsado. (BANAT NEWS)