Veto ni JVR bahin sa paglaslas sa jo quotas ma-override ra

CEBU, Philippines - Ang veto ni Mayor Johnny De los Reyes kabahin sa quota sa mga job order posibleng ma-override kini matud ni Bise Mayor Romeo Villarante.

Kahinumduman nga sa milabay’ng semana si De los Reyes mi-veto sa Section 5 sa Appropriation Ordinance sa siyudad nga nagkanayong matag konsehal sa siyudad dunay katungod nga mopatrabaho og 50 ka mga job order ug 100 sa bise mayor.

Kahinumduman usab nga gikan sa tag 50 ka mga JO ang matag konsehal gihatagan na lang kini karon og tag 20 ka quota gawas nila ni Konsehal Eduardo Gullas, III ug ex-officio member nga si Raul Cabanero nga tag lima lang.

Si Villarante nga nahinabi kagahapon sa mga tigbalita nagkanayon kining magpahigayon sila og special session kagahapon sa alas 2:00 sa hapon diin ang kabahin sa pag-veto sa mayor ang ilang tukion.

Matud sa bise mayor nga kutob lang karong Enero 5, 2014 ang deadline nga motubag sila sa veto sa mayor.

Gibutyag ni Villarante nga buot sa mga konsehal nga unta hatagan sila og konsiderasyon sa 20 ka quota matag usa kanila ug dugangan unta kini.

Matud usab ni Villarante nga ang kabahin sa quota nila ni Digul ug Cabañero ang hatagan usab nila og pagtagad nga mahatagan og konsiderasyon.

Apan gibutyag ni Villarante nga posibleng ma-override ang veto sa mayor tungod kay posibleng dunay konsehal nga ubos sa Liberal Party nga mobotar sa pag-over ride sa veto.

Kahinumduman nga ang mga konsehal nga kaalyado sa Alayon pito lang kini ug upat sa LP. Aron ma-override ang veto sa mayor nagkinahanglan og walo ka boto o 2/3 nga gidaghanon sa mga sakop sa konseho ang mobotar. (/EIM)(BANAT NEWS)