CEBU, Philippines - Duha ka managlahing aksidente sa kadalanan ang natala niadtong bisperas sa Bag-ong Tuig nga mikalas og duha ka mga kinabuhi.
Si John Ryan Pilapil,7, sakay sa usa ka tricycle nga gimaneho sa iyang amahan nga si Rex Brian Pilapil, 27, kinsa naangol usab lakip ang iyang igsuong si Jorex, 9.
Niadtong Disyembre 31, 2013 alas 11: 55 sa gabii, matod pa nakadawat og tawag ang Consolacion Police Station nga dunay vehicular accident sa Provincial Road sa Pagutlan, Tayud, Consolacion.
Ang traffic investigator nga si PO1 Raymond Lleve, kauban ang tulo ka traffic enforcers daling miresponde sa lugar ug nasuta nga nagkabangga sa mga Pilapil ang motorsiklo ni Chender Pepito, 23, taga Baja-baja, Tayud, Consolacion.
Matud pa nga padung sa north ang traysikol niadtong tungora ug miliko sa wala apan nadasmagan kini sa nagmotor nga si Pepito diha sa pikas lane nga padung sa south.
Si John Ryan, kinsa diha naglingkod sa tangke sa traysikol sa atubangan sa iyang amahan maoy nagrabehan ug gideklarar nga patay na pag-abot sa Vicente Sotto Memorial Medical Center.
Ang sakay usab ni Pepito, nga si Cristoto Lauron, naangol usab sa maong aksidente.
Nasuta sa imbestigasyon nga walay headlights ug plate number niadtong higayuna ang motor ni Pepito, sumala pa usab nga wala usab kini rehistro ug wala say lisensya si Pepito.
Si Rex Brian miangkon usab nga nakainom niadtong tungora.
Ang motor nga gipanag-iya ni Pepito gi- impound karon sa Consolacion Traffic Enforcement Service.
Samtang usa ka wala mailhing lalaki ang patay human mabanggai sa usa ka pribadong sakyanan sa National Highway, sa barangay Tuyan, Naga City, Cebu niadtong Miyerkules sa alas 8:30 sa gabii human kini milabang sa kalsada.
Matod sa Naga City Police Station nga ang wa mailhing biktima gibanabanang nagpanuigon og 35-anyos, 5’5 ang gitas-on ug nagsuot og blouse ug maong skinny jeans niadtong higayuna. Ang nakadasmag mao si Bonifacio Bontilao, 40 taga Barangay Pusok, Lapu-Lapu City. Si Bontilao giingong gikan sa Oslob, Cebu niadtong tungora. - /EIM (BANAT NEWS)